အလင်းဆိုင်
======
"အိမ်ပြန်ချင်တယ် ဟူး ဟူး၊အနွေးထွေးဆုံး အမေ့အိမ်"ကိုငှက်ရဲ့ သီချင်းတွေ လွင့်ပျံလို့။
အလင်းဆိုင်တဲ့၊ ကြားရတာနဲ့ကို နွေးနွေးလင်းလင်းလေး။
ဘယ်မှာ ရှိသလဲ၊သွားမယ်၊ မြို့ထဲကနေတော့ တစ်နာရီခွဲလောက် သွားရမယ်။ မြောက်ဒဂုံ ရ/၈ လမ်းဆုံမှာ ရှိတဲ့ ဆိုင်လေး၊ အဓိပတိ အဝါတို့၊ ၁၇၄တို့၊ ၂၁၃ တို့ ပြေးတဲ့ လမ်းကြောင်းပေါ်။
ဆိုင်ထဲကို ဝင်တဲ့ အခိုက်မှာပဲ၊ အရာရာဟာ ဖမ်းစားလွန်း။ နံရံအပြည့် ပန်းချီကားတွေ၊ ကဗျာလက်ရေးမူတွေ။ ရှေ့အဝင်မှာ ကိုငှက် (ထူးအိမ်သင်)က ချစ်ခြင်းအားဖြင့် ပြုံးပြလို့။ ဆိုင်တည်ဆောက်ပုံကကို အနုပညာဆန်တာ။ သစ်သားစားပွဲ၊ကုလားထိုင်လေးတွေပေါ် ထိုင်ပြီးတဲ့ အထိ ကိုယ်တို့မှာ ခေါင်းခါခါ လည်ခါခါ၊ မြင်မြင်သမျှက ပြုစားထားသလိုမျိူး။
Menu ကြည့်တော့ coffee မျိူးစုံရတယ်၊ iced coffee ရတယ်၊ juices တွေ ရတယ်။ လက်ဖက်သုပ်၊ပဲခြမ်းသုပ်စတာမျိုးရတယ်၊ ကြက်ကြော်၊ sandwich စတာမျိုးလည်း ရတယ်။ စျေးတွေလည်း ချိုတယ်။ အလင်းဆိုင်ကော်ဖီဆိုတာ စမ်းသောက်ကြည့်ကြ။ coffee တစ်ခွက်နဲ့ ကိုငှက်သီချင်းတွေနဲ့ ပျော်ဝင်ပြီး ငြိမ့်ငြိမ့်ညောင်းညောင်းနေနေကြ။
ပြီးတော့မှ သေချာ ဆိုင်တစ်ပတ်ပတ်ကြည့်ပြီး ခံစား၊ တစ်ချို့ဟာတွေက ဓာတ်ပုံရိုက်ဖို့ မဟုတ်၊ ဒီတိုင်း ရင်သပ်ရှုမောခံစားနေတာ ပိုကောင်းရ။ ဆရာတာရာမင်းဝေ၊ ဆရာ သစ္စာနီတို့ရဲ့ ကဗျာတွေ၊ ကိုငှက်ပုံတူ ပန်းချီတွေ၊ ကိုငှက်ရဲ့ အငွေ့အသက်တွေ၊ ပန်းချီကားတွေ တစ်ချပ်ပြီး တစ်ချပ်။ ဆိုင်ထောင့်က စာအုပ်စင်လေးက စာအုပ်လည်း ယူဖတ်နိုင်၊ ဘယ်လို idea နဲ့ ဘယ်လို စေတနာမျိုးလဲ၊ ကိုယ့်မှာ ကျေးဇူးတင် အံ့သြရ။
ဆို်င်ရဲ့ ညာဘက်ခြမ်းဟာ မီးရောင်ပြာလဲ့လဲ့နဲ့ အေးစက်ညင်သာ၊ ဆိုင်ရဲ့ ဘယ်ဘက်ခြမ်းဟာ သဘာဝအလင်းရောင်နဲ့ နွေးထွေးဖြာကျ။ စနေ၊တနင်္ဂနွေ မှာ တီးဝိုင်းနေရာလေးမှာ တီးကြ၊ဆိုကြသေးသတဲ့။ ဝါသနာပါတဲ့ သူတွေ အကြိုက်ပဲ။
ရှေးက ရှားပါးဇာတ်ကား ပိုစတာတွေ၊ လက်မှုပစ္စည်းတွေက ထပ်ခံစားရနိုင်တဲ့ အပိုဆု။
ကုန်ကုန်ပြောရရင်ကွယ်၊ မြို့ပြရဲ့ ဆူညံပွက်လောင်မှုတွေက ခဏပြေးချင်သူတွေအတွက် နှစ်မြုပ်ရင် နှစ်မြုပ်နိုင်သလောက် အချိန်တွေ ဘယ်လောက်ကုန်သွားမှန်း မသိစေတဲ့ နေရာတစ်ခု၊ အဲ့ဒါ အလင်းဆိုင်။
#ရိ်ုးလူ
